انا محتاج إيه لو اشتريت ماكينة حفر راوتر - منشور رقم (3)

أنا محتاج إيه لو اشتريت ماكينة حفر راوتر – منشور رقم (3)
---------------------------------------------------------------

كل متابعي كام تك وحشتونا كتير والله وبنقولكم اننا مقصرين معاكم لكن سامحونا لأننا كنا بنجهز المكتب الجديد بتاعنا في المعادي  وبنقولكم شرفونا في أي وقت واحنا تحت أمركم لو محتاجين أي استشارة او معلومة 

طبعاً إحنا مكملين معاكم سلسلسة مقالات انا محتاج إيه لو اشتريت ماكينة حفر راوتر وده المنشور رقم 3 لكن خلونا نفكركم بالمنشورات ال فاتت وكنا اتكلمنا في المقال الاول عن ايه العناصر ال محتاجها قبل ما تشتري راوتر واتكلمنا عن السوق ، والكهرباء ، والمساحة المطلوبة وده رابط المقال http://bit.ly/2dvdmkY

وفي المقال التاني اتكلمنا انك لازم تتعلم برنامج التصميم الآرت كام ، وانك محتاج مصمم او مشغل لو مش هتشتغل بنفسك ، وكمان لازم تاخد بالك من شوية حاجات وانت بتشتري الماكينة ، واتكلمنا عن البنط وانواعها ، والتصميمات ال هتشتغل بها وده رابط المقال رقم 2 http://bit.ly/2dvdmkY

النهاردة في المقال الثالث هنتكلم عن ازاي تسوق لشغلك والمقال المرة دي تقيل شوية يعني حضرتك محتاج كوباية قهوة وورقة وقلم وتركز معانا 

طبعا الحمد لله كده احنا جبنا الماكينة وجهزنا المكان بتاعنا ورتبنا شغلنا وجهزنا التصميمات مش باقي بس غير ان الناس تخبط علي باب ورشتنا او مصنعنا وربنا يرزقنا وييسر لنا الأمور ، تعالوا هنشوف هنعمل ده ازاي :

1** خليك بشوش ومبتسم : دايما الناس بتحب الأشخاص البشوشين والمبتسمين وبتبعد عن الناس ال دايما مكشرين ومضايقين فحضرتك لازم تاخد بالك وانت بتستقبل الزباين انك تكون مبتسم وبشوش واوعي تكون مكشر او متضايق

2** العينات والهدايا المجانية : هتلاقي بعد كده الناس بدأت تيجي عندك وتطلب شغل حاول دايما تقدم اول شغلانة للزبون ال هيجي عندك ببلاش وعارف انك هتقولي انا هكسب ايه ؟ هقولك ان بسبب الحركة دي الزبون هيفضل فاكرك وهيكون عليه دين معنوي انه لازم يردوهولك وهيعملك احلي دعاية وهيجيلك تاني ويعمل معاك شغل يعني انت الكسبان متقلقش

3** اعمل عينات كتير : في بداية اول 3 شهور من شغلك هتلاقي ان الناس لازم تعرف انت بتعمل ايه ولازم تعرفهم بشغل الراوتر علشان كده اعمل عينات كتير جدا وحطها قدام الورشة وعلقها جوه الورشة بحيث النجارين او الصنايعية وهم ماشيين يشوفوا شغلك وبالتالي هيطلبوا منك انك تعملهم نفس الشغل المعروض وكمان هتلاقي ناس بتشتري منك العينات دي يعني الفلوس مش هتروح عليك متقلقش ، طبعا اعمل عينات مختلفة زي مثلا وش سرير ، ضلفة مطبخ ، ضلفة دولاب ، برواز ، وش باب ، فواصل خشبية وغيرهم يعني نوع في العينات .

4** خليك مميز : دايما في التميز يعني انك تبقي بتعمل حاجة غيرك مش بيعملها وفي مشروع الراوتر حاول تبقي عندك حاجة مميزة زي مثلا انك تكون بتشتغل اكبر وقت ممكن ، او انك تخلي التوصيل مجانا ، او انك تسلم الشغل في خلال 48 ساعة بحد أقصي ، او مثلا سعرك يكون اقل سعر بس خد بالك لانك ممكن تحرق اسعار السوق وتحرق نفسك وانت الخسران في الحالة دي .

5** ابتكر تصميمات : الابتكار حاجة جميلة بتخلي الناس تنجذب إليك دايما علشان كده حاول تبقي مبتكر اعمل مثلا تصميم اوضة نوم جديدة واعرضها علي النجارين اوالزباين ال بتشتغل معاهم ، لان ده ال هيخليك مختلف عن غيرك وطبعا في تصميمات كتيرة علي النت وما اكثرها حاول تختار منها افضل التصميمات واعملها علي الراوتر

6** اعلن عن نفسك : اكتر حاجة هتقابلك انك لازم تعرف الناس بيك وده هيكون من خلال الاتصال ببعض النجارين ال انت عارفهم وتقولهم انك فتحت راوتر وبالتالي هيجو يعملوا شغلهم عندك ، او انك تنزل تلف علي النجارين بنفسك وده مش عيب ولا حرام بالعكس انت بتسعي لشغلك واكيد ربنا هيكرم ويفضل كمان لو عملت برشور او ورقة صغيرة فيها شغلك واديها للزبون ده هيكون مرجع له في اي وقت لو احتاج شغل راوتر

7** احتفظ ببيانات عملائك : كل زبون يجي يعمل شغلانة عندك خد اسمه ورقم تليفونه في أجندة صغيرة ومن فترة للتانية كلمهم وابعتلهم رسائل لان ده هيخلي عند عميلك نوع من المودة والألفة وهيرتبط بورشتك وبمكانك

8** اعمل يافطة علي باب محلك او ورشتك : يافطة صغيرة تجلب زباين كتيرة :Dودي حاجة مش هتكلفك كتير وهتعملك شهرة في وقت قصير وهتخلي اي حد يقرأ اليافطة يبقي عايز يجرب ويشوف ايه ده

9** حافظ علي مواعيدك : من اول يوم شغل خليك دايما محافظ علي مواعيد الورشة لان ده هيخلي الناس عندها مصداقية من ناحيتك وهيبين انت اد ايه مهتم بشغلك ومحافظ عليه فبلاش تستهر بالنقطة دي ومش معني انك صاحب ورشة او مكان يعني تفتح وتقفل وقت ما انت عايز لان ده بعد شوية هيكون سبب في فشلك

10** اوعي تشتم منافسينك : من اكتر الحاجات السيئة ان ممكن تلاقي منافس بيشتم في التاني وبيعتقد ان ده ممكن يخلي الناس تيجي عنده بالعكس ده هيقلل منك وهيخليك محل انتقاد فابعد عن انك تشتم منافسينك او تذكرهم بسوء وخليك واثق ان كل واحد بياخد رزقه ما عليك سوي السعي والإجتهاد

11** شغلك بيعبر عنك : في مثل بيقول جودة المنتج هو افضل وسيلة للتسويق يعني دايما خلي شغلك نضيف استخدم بنط محترمة بلاش تسترخص اهتم بأدق التفاصيل علشان شغلك هيتكلم عنك وبطبيعة الحال هيخليك رقم واحد في السوق ، وده مش معناه انك مش هتبوظ شغل بالعكس هتبوظ شغل كتير وهتخسر في الأول لكن حاول تقلل من ده علي قدر الامكان وكمان ترضي زباينك لانهم رأس مالك

دول طبعاً 11 عناصر حاولنا نجمعهم من خلال شغلنا وخبرتنا في المجال ولو ناسيين حاجة ياريت تذكرونا بها وياريت تقولولنا اي اكتر حاجة لفتت انتباهكم في المقال 

البوست الجاي ان شاء الله هيكون عن ايه المشاكل والعقبات ال هتقابلك في مشروعك وازاي تتغلب عليها ؟

لو شايف ان البوست مهم متنساش لايك وشير علشان غيرك يستفيد 

لو في أي استفسار احنا تحت امركم

للتواصل مع قسم خدمات التشغيل والتصنيع للغير : 01000114082
للتواصل مع قسم بيع الماكينات الراوتر والليزر : 01091039978

العنوان : 4 شارع 75 ناصية شارع 12 الدور الأول شقة 1 - المعادي - القاهرة

#كام_تك .... خدمة تليق بك